LAOAG CITY – Maipangpangruna a mabenepisiaran ti Africa kadagiti bakuna kontra iti monkeypox gapu iti agtultuloy a panagadu ti kaso iti nasao a sakit.
Daytoy ti kinumpirmaran ti Department of Health kalpasan a nakitaripnong kadagiti pannakabagi ti World Health Organization.
Kunana a nakitaripnong met ti ahensia kadagiti health expert maipanggep iti nasao a sakit.
Inbatad ni Health Secretary Teodoro Herbosa, nagtulag dagiti adu a pagilian nga iti agdama ket ipangpangruna pay laeng ti Africa ti pannakaibunong ti bakuna kontra iti monkeypox.
Gagem daytoy a saanen nga agwaras pay kadagiti kaparanget a pagilian.
Basar iti datos ti Department of Health, dumanonen iti 12 ti kaso ti monkeypox kalpasan a nairekord ti dua a baro a kaso daytoy idiay Metro Manila.
Iti baet daytoy, inpasingked ti ahensia nga agpareserba latta ti Pilipinas ti nasao a bakuna kontra iti monkeypox.
