LAOAG CITY – Plano ti African Union (AU) ti gumatang agingga iti 110-milyon doses ti covid-19 vaccine manipod iti Moderna Inc.
Manamnama nga ideliver ti Moderna ti umuna a 15-million doses idiay Africa iti maudi a paset ita a tawen kas nailanad iti katulagan babaen ti panangidaulo ti White House.
Naamoan a ti nayun a 35 million doses ket maideliver iti umuna a quarter ti 2022 idinto a ti 60 million doses ket iti maikadwa a quarter.
Inbatad ni Stéphane Bancel, ti chief executive ti Moderna a dakkel ti maitulong ti bakuna da kadagiti maibilang a nakukurapay a pagilyan.
Ti Moderna vaccine ket agdama a maibakbakuna iti Nigeria, Ethiopia, Tunisia, Kenya, Ghana, Rwanda, Mali ken ti Democratic Republic of Congo.
Agpapan ita ket 5 a porsiento pay laeng manipod iti populasyon ti Africa ti nakaawat ti kompleto a bakuna kontra iti covid-19.
