LAOAG CITY – Nawaya-wayaanen ti agarup 100 nga estudiante a na-kidnap idiay Nigeria.
Simmangpet dagitoy iti kabisera ti Niger state a Minna a nakalugan kadagiti minibus a binayabayan dagiti kameng ti military vans ken armored vehicles nga inawat isuda ni Governor Umar Bago.
Saan met pay a nalawag ti dadduma pay a detalye no ti pannakawaya-waya dagiti ubbing ket babaen ti negosasion wenno no adda ti naibayad a ransom.
Adda ti sumurok 250 nga estudiante ken 12 nga staff ti na-kidnap iti napalabas a bulan manipud iti St. Mary’s Catholic school iti Papiri, ti kaudian a kadakkelan a bilang ti panag-kidnap kadagiti ubbing.
Mainaig iti daytoy, naisubli dagiti estudiante iti pagadalan a masarakan iti sumurok 300 a kilometro manipud iti state capital a maminsan manen a makaduada ti pamiliada.
Inrakurak ni Governor Abdullahi Sule ti Nasarawa state nga adda ti napateg nga akem ti federal government iti pannakawaya-waya dagiti estudiante ken saan a mabalin a maibuksilan ti behind-the-scenes efforts para iti naan-anay a seguridad.
Maipalagip a bimmisita ni National Security Adviser Nuhu Ribadu iti Papiri ken nakipagkita iti delegasion nga indauluan ni Bishop Bulus Dauwa Yohanna tapno ipasigurado a maisalakan dagiti ubbing iti kabiitan a panawen.
Immuna iti daytoy, adda ti 153 nga estudiante ken 12 nga staff members ti nagtalined a mapukpukaw babaen kadagiti saan pay a nabigbig nga armado a lallaki.
Kabayatanna, ngumatngato dagiti pagadalan ken dadduma pay a lugar a pakaisaysayangkatan ti worship ti target iti panangatake iti north ken central Nigeria.
