LAOAG CITY – Inanunsio ti White House a “terminated” wenno nalpasen ti gubat iti Iran kalpasan a natungpalna ti naikeddeng a deadline ti aldaw a panaglippas ti gubat idi Biernes oras ti Amerika.
Iti babaen ti 1973 United States War Powers Resolution, maibilangen a nalpasen ti 60 nga aldaw a pawayway ti Kongreso tapno palubosan ti Presidente ti Amerika a mangiwayat ti military operations nga awan ti pammalubos manipud kadakuada malaksid laeng no iyalud-od wenno aprobaran ti lehislatura.
Nangrugi nga immatake ti Estados Unidos ken Israel iti Iran idi Pebrero 28.
Inbatad ni Senador Jeanne Shaheen ti New Hampshire, awan ti nakailanad iti linteg a mangipapaay ti pagibasaran tapno ideklar nga ‘hostilities’ no agtultuloy ti presensia ti puersa ti militar iti rehion.
Innayonna a saan pay a nalpas ti riribok gapu ta agingga ita ket adu dagiti barko ti Amerika nga agbanbantay ken manglaplapped iti oil exports ti Iran.
