LAOAG CITY – Umabot iti agarop 2,000 nga estudyante ken mangisursuro iti Indonesia ti nagsakit ken naitaray iti ospital gapu kadagiti libre a taraon a naipaay kadagiti pagadalan iti uneg ti tallo nga aldaw.
Ti pannakaipaay ti libre a taraon kadagiti pagadalan ket maysa kadagiti kangrunaan a programa ti gobierno ti Indonesia a naawagan ti Makan Bergizi Gratis (MBG) programme.
Basar iti report, kalpasan a nakapangan dagiti estudyante ken mangisursuro ket nakarikna da ti panagsakit ti buksit ken panagkapsot rason a naitaray dagitoy iti ospital.
Adda met dagiti dadduma nga estudyante ken mangisursuro a pinili da ti nagpaitulnog laengen iti pagtaengan da.
Naipasingked met ti panangibaklay amin ti gobierno iti magastos iti panagpaagas dagiti naapektaran ti maipagarop a food poisoning, kagiddan ti pannakaimbestigar ti local food distributor a maitudtudo nga akin-responsibilidad iti napasamak.
