LAOAG CITY – Addan iti pinilaan ti Ilocos Norte Highway Patrol Group iti reklamo seknan iti investment scam.
Daytoy ket kalpasan a nakarekubre da iti lima a lugan a dagitoy ket maipagarup a carnap ken naggapu iti nasao nga scam.
Binigbig ni P/C/Inps. Rufino Noog, Hepe ti Ilocos Norte Highway Patrol Group ti pinilaanda ti kaso a ni Roy Gonong, mangidadaulo ti Kabulinawan Producers Cooperative ken Kabulinawan Lending Corporation nga adda branchy na iti ciudad ti Batac ken dua a sabsabali pay.
Segun ken ni Noog, agarup 54 a million a pisos ti naitaray ni Gunong manipud kadagiti sinasarsaritaan da a nag-invest kas kadagiti professionals, pulis, gov’t employees, negosyante ken dadduma pay.
Inlawlawag na a ti modos dagiti suspek ket kunbinsiren da ti maysa a tao nga ag-invest iti dakkel a kantidad kasukat ti 5 a porsiyento iti kada bulan nga anak na a maited iti investor ken iyalanda ti kabarbaro a lugan a ti agbayad ket ti nasao a lending corp. ngem saan da nga agbayad agingga a tarayndanto daytoy.
Innayon ni Noog a ti operasyon ti grupo ket ditoy Region 1, 2, 3 ken iti Cordillera.
