LAOAG CITY – Binagkong ti mismo a padre de pamilia ti agina daytoy iti maysa nga apartment iti Barangay 13 ditoy siudad ti Laoag.
Basar iti Laoag City Police Station, iti agarup 12:45 ti parbangon, simmangpet ti ama a suspek iti apartment ti agina ket kellaat a kinomprontarna ti asawana.
Nakapungtot ti suspek ken dinangranna ti asawana iti saan a masinunuo a rason.
Gapu iti daytoy, napan inanawa ti anak ti amana ngem nagiruar ti suspek ti nangisit a folding knife ket ditoy a binagkongna isuna iti akinkannawan a gurongna ken kalpasanna ket binagkongna pay ti asawana iti akinkannawan a luppona.
Insigida met a naarestar ti suspek apaman a simmangpet dagiti nagresponde nga otoridad idinto a naitaray dagiti agina a biktima iti Mariano Marcos Memorial Hospital and Medical Center iti siudad ti Batac para iti pannakatamingda.
Kabayatanna, rumrummuar a ti maipagarup a motibo ti insidente ket gapu iti problema ti pamilia ken imon.
Iti agdama, maisagsagana ti maipila a kaso kontra iti suspek.
