LAOAG CITY – Inpasingked ni Atty. Nikki Pilar, ti mangidadaulo iti Metro Ilocos Norte Council ti gobierno probinsial a saan a makaawat ti benepisio ti asinoman nga aglabsing iti Jeepney ken Tricycle Matrix nga inyatnag ti nasao a pangopisinaan.
Segun kenkuana, babaen iti daytoy ket ad-adda a sumurot dagiti amin a maseknan a tricycle driver ti naiget a maipatpatungpal a pagannurutan.
Inbatadna a pinaayabanda amin dagiti Presidente ti Tricycle Operators and Drivers Association pakairamanan dagiti jeepney tapno mailawlawag a naimbag kadakuada ti maipanggep iti panangiparuk-atda ti Fare Matrix.
Inlawlawagna nga adda pay ti inyestablisarda a Main Command Post iti Ilocos Norte Centennial Arena a pakaidanonan dagiti reklamo dagiti pasahero wenno umili maipapan iti sektor ti transportasion.
Malaksid iti daytoy, kunana nga adda ti inruarda nga hotline numbers para iti al-alisto a komunikasion a mabalin a tawagan wenno i-text iti numero a 0915-586-9422 ken 0960-897-7159.
Innayonna a dagiti mapaneknekan a naglabsing iti maipakpakat a pagalagadan ket mapatawan ti maiyannatop a pannusa.
