LAOAG CITY – Sinungbatan ni Mr. Cipriano Perry Martinez, Acting General Manager ti Ilocos Norte Electric Cooperative (INEC) iti saludsod no apay saanda a maplastar iti efficiency collections iti kada zone.
Inlawlawagna nga iti agdama ket agpatingga iti 98-99% daytoy gapu ta saan met a dagus ti panagkolektar iti kada zone ken panagbayad dagiti konsyumer.
Inpalgakna a maysa kadagiti kangrunaan a rason no apay a saan a maplastar ti efficiency collection-da ket adda dagiti sumagmamano a saan a makabaybayad ti kuriente.
Gapu iti daytoy, kunana nga agsurat dagiti maseknan a konsyumer iti opisinada a mangilawlawag no apay saanda a makabayad iti naituding a petsa.
Innayonna nga ikarkarigatan ti kooperatiba nga aramiden amin ti wagas tapno ad-adda pay a mapasayaat ti sistema ti Ilocos Norte Electric Cooperative.
