LAOAG CITY – Dua a nasinged nga agpagayam idiay Australia ti nakagun-od ti world record gapu ta innem a dekada a tradisionda ti panagsisinnukat ti birthday greeting card.
Kinumpirmaran ti Guinness World Record a ti ag-best friend nga isuda Lynley Lambert ken Jeanette Graham ti akin-iggem ti world record title a “Longest Birthday Card Exchange,” kalpasan a pagpinpinnasaanda iti uneg ti 61 a tawen ti maysa a birthday greeting card.
Naammoan nga idi Marso 1963, pinatuludan ni Lynley ni Jeanette ti greeting card tapno kablaawanna iti panagkasangayna. Apaman a nadanon met ti panagkasangay ni Lynley ti Disiembre iti kapada met laeng a tawen, napanunutan ni Jeanette nga ipatulod nga isubli ti nasao a card. Sipod idin, nagsubli-subli ti maymaysa a card iti uneg ti innem a dekada.
Iti agdama, agtawenen iti 84 ni Jeanette ken ni Lynley met ket 80 years old. Basar kadakuada, awan ti planoda nga isardeng ti tradision ti panagsinnukat ti greeting card.
