LAOAG CITY – Manamnama nga umawat ti baro a pammadayaw ti boxing legend ken People’s Champ Manny Pacquiao kalpasan nga ianunsio nga isuna ket agbalin a paset ti Class of 2027 ti United States National Boxing Hall of Fame.
Inaramid ti anunsio iti 3rd Pacquiao-Elorde Awards Night a naisayangkat idiay Manila no sadinno a kinumpirmaran ni Eric Schmidt ti nasao a pammigbig.
Sakbay daytoy, nairaman metten ni Pacquiao iti International Boxing Hall of Fame Class of 2025 idiay Canastota, New York ket ditoy a nakaduana ti padana a Pilipino a boxing greats nga isuda Gabriel Elorde ken Pancho Villa.
Mabigbig ni Pacquiao kas agmaymaysa nga eight-division world champion iti pakasaritaan ti boksing nga addaan ti 12 a major world titles ken nakalabanna ti 22 world champions iti pakabuklan ti ay-ayamna.
Iti surat manipud iti National Boxing Hall of Fame, nadakamat ni Pacquiao kas “Main Event” inductee para iti Class of 2027.
Dinayaw ti kontribusionna saan laeng iti benneg ti boksing no diket pakairamanan ti serbisio iti pagilian.
Naikeddeng nga agatendar ni Pacquiao iti induction ceremony a maisayangkat inton Abril 25, 2027 iti Quiet Cannon idiay Montebello, California.
