LAOAG CITY – Inkalintegan ti Malacañang ti pannakadutuk ni dati a Senador Manny Pacquiao kas baro a lead convenor ti National Anti-Poverty Commission, gapu iti personal a kapadasan na iti kinarigat ti panagbiag ken nabayagen a panangtultulong na kadagiti marigrigat.
Segun ken ni Palace Press Officer Claire Castro, karaman kadagiti nagbalin a konsiderasyon iti panangpili ken ni Pacquiao ti panagbalin na a pamilyar ti sitwasyon dagiti marigrigat ken gagem na a matulungan dagiti agkasapulan.
Maipalagip a nagsapata ken ni Presidente Ferdinand Marcos Jr. ni Pacquiao kas NAPC Secretary ken lead convenor.
Ti kangrunaan nga obligasyon ti ahensya ket ti pannakaikonektar dagiti polisiya ken programa ti gobierno para iti poverty reduction, partikular para iti basic sectors.
Sinukatan ni Pacquiao ni Lope Santos III kas national anti-poverty commission lead convenor.
Kuna ni Castro, awan ti inted a rason ti Malacañang iti nagbalin a panagbalbaliw iti liderato ti komisyon.
