LAOAG CITY – Agbirbirok ti posible a makalaban ti kampo ni boxing legend Manny Pacquiao para iti maysa pay a laban sakbay nga agngudo ti tawen kabayatan nga iyur-iyuray ti padpadaanan a rematch daytoy ken ni Floyd Mayweather Jr. a target nga iwayat inton Enero 2027.
Inbatad ni MP Promotions CEO Jas Mathur a manarimaan ti pannakisarsarita kadagiti sumagmamano a posible a laban ni Pacquiao pakairamanan ti maysa nga exhibition match a plano nga isayangkat iti maudi a paset ti tawen.
Kunana a saanda nga iwalin ti posibilidad ti maysa a regular a professional fight.
Nupay kasta, inlawlawag ni Mathur nga awan ti pinal a kalaban ken agtultuloy pay laeng ti negosasionda iti sumagmamano a kampo dagiti boksingero.
Karaman kadagiti nagan a mabalin a kalaban ni Pacquiao ket isuda WBA welterweight champion Rolando “Rolly” Romero ken WBC welterweight champion Ryan Garcia.
Kabayatanna, saanen a matuloy ti rematch da Pacquiao ken Mayweather nga immunan a naikeddeng inton Setiembre 19 idiay Las Vegas, Nevada isut gapuna a manmnama a maiwayat inton Enero inton sumaruno a tawen.
