LAOAG CITY – Naragsak a nangipakaammo ni Mr. Vic Ines iti Department of Agrarian Reform nga awan dagiti nairekord da a perdisyon nga inpaay dagiti naglabas a bagyo ditoy probinsya kadagiti Agrarian Reform Beneficiaries Organization.
Inpakaammo ni Ines a sakbay ti iduduprak dagiti bagyo ket adda ti inpatungpal ti nasao nga opisina a training tapno agbalin a climate resilient dagiti benepisyaryo ti Agrarian Reform Beneficiaries Organization ken tapno maisuro kadakuada dagiti rumbeng nga aramiden tapno malimitaran ti epekto ti climate change kadagiti mula da.
Inbatad ni Ines a naobserbaran da a dakkel a tulong dagiti ipatpatungpal da nga aktibidad.
Kabayatanna, inpakaammo ni Ines nga umabot iti walo a milyon a pisos ti balor dagiti farm machineries ken equipment a naibunong kadagiti Agrarian Reform Benificiaries Organization ditoy probinsia.
Innayon na nga adda ti 11 nga Agrarian Reform Beneficiaries Organizations ti immawat kadagiti farm machineries ken equipment kas ti hand tractors, water pumps, multi-function tillers/cultivators, 4WD tractors, ken driving-type small rice harvesters.
