LAOAG CITY – Natay ti maysa a menor de edad a babai kalpasan a nalmes iti Labogaon Dam iti ili ti Solsona.
Segun kenni Police Staf Sergeant Joemar Inggo, Duty investigator iti Philippine National Police iti ili ti Solsona, ti biktima agtawen ti innem ken residente iti Brgy. Manalpac iti nasao nga ili.
Basar iti naisayangkat nga imbestigasyon dagiti otoridad, nagturong iti dam ti pamilya ti biktima tapno aggulgol.
Inbatad na a saan a kadua ti biktima dagiti nagannak kenkuana gapo ta ti ina na ket nagbati iti pagtaengan da idinto a ti ama na ket adda iti ciudad ti Baguio.
Inlawlawag na a kalpasan ti panaggulgol dagiti maseknan ket nagdidigos da idi kellaat a saan dan a mabirukan ti ayan ti ubing ken nakita da laengen ti bagi ti biktima a tumtumpaw iti igid ti dam.
Dagus met a naitaray ti biktima iti Dingras District Hospital ngem naideklara a dead on arrival.
Kabayatanna, nagballaag ti Philippine National Police iti ili ti Solsona iti publiko nga agannad iti panagturong kadagiti pagdidigusan.
