LAOAG CITY – Inbilin ni Presidente Ferdinand Marcos Jr. ti agtultuloy a panagsagsagana dagiti ahensia ti gobierno kontra iti panaglayus.
Kagiddan daytoy ti report ti Department of Public Works and Highways (DPWH) a nalpasen ti dakkel a drainage system iti G. Araneta Avenue idiay Quezon City a masansan a malaylayus.
Triple ti kadakkel daytoy tapno al-alisto ti taray ti danum ken saan nga insigida a ngumato ti layus iti kalsada.
Naitultuloy ti dadduma pay a proyekto kas ti panagaramid ti water pumping station iti E. Rodriguez Avenue ken panagdalus ti San Juan River tapno saan a makaabbeng iti pagtarayan ti danum.
Nagpanawagan ti Presidente iti publiko a saan nga agibelleng ti basura kadagiti karayan ken drainage system gapu ta maysa daytoy kadagiti kangrunaan a makaigapu ti panaglayus.
Inpettengna nga agtignay ti gobierno ngem kasapulan met ti disiplina ti tunggal maysa tapno makissayan ti pannakadadael no mapasaran ti panagtutudo.
