LAOAG CITY – Nagpirma ti akinkukua ti TikTok a ByteDance iti katulagan kaduana ti Estados Unidos ken dagiti global investors tapno agoperar ti negosioda idiay Amerika.
Daytoy ti inpakaammo ti employer ti TikTok kadagiti empleadoda.
Kagudua ti joint venture ket kukua ti maysa a grupo dagiti agpuonan pakairamanan ti Oracle, Silver Lake ken ti Emirati investment firm nga MGX, basar iti memorandum nga inpatulod ti chief executive a ni Shou Zi Chew.
Basar iti katulagan, naikeddeng nga agserra inton Enero 22, ket aglippas kadagiti tawen ti panangikagumaan ti Washington a piliten ti ByteDance nga ilako dagiti operasion daytoy iti Estados Unidos gapu kadagiti national security concerns.
Daytoy ket maiyataday iti maysa a katulagan a nairakurak idi Setiembre idi itantan ni United States President Donald Trump iti pannakaipatungpal ti maysa a linteg a mangipawil iti app malaksid no daytoy ket mailako.
Nailanad iti memorandum, inbatad ti TikTok a ti katulagan ket mangipaay ti wagas kadagiti sumurok 170 a milyon nga Amerikano nga agtultuloy iti panangduktal iti lubong nga awan ti patinggana a posibilidad kas paset ti maysa a napateg a global community.
Iti babaen ti katulagan, pagtalinaeden ti ByteDance ti 19.9% ti negosio idinto a ti Oracle, Silver Lake ken Abu Dhabi-based MGX ket addaan ti iggem a 15% iti tunggal maysa.
