LAOAG CITY – Inrakurak ni United States President Donald Trump a planona a talantanen ken ni Chinese President Xi Jinping ti maipapan iti panaglako ti armas ti Estados Unidos idiay Taiwan iti dandanin a panagtaripnongda idiay Beijing.
Inbatad ni Trump a kalikagum ni Xi nga isardeng ti Amerika ti panangipaay kadagiti armas idiay Taiwan isu a karaman daytoy kadagiti kangrunaan a banag a pagsaritaanda.
Naikeddeng a sumangpet ni Trump idiay Beijing inton bigat, aldaw ti Mierkoles sakbay ti bilateral talks a maisayangkat inton Huebes ken Biernes.
Daytoy ti kaunaan a panagbisitana idiay China kalpasan ti siam a tawen.
Nabayagen a pagtataudan ti tension iti nagbaetan ti Washington ken Beijing ti suporta militar ti Estados Unidos idiay Taiwan.
Ibilang ti China a paset ti teritorioda ti self-governed island idinto a naiget a konkontraen ti Taiwan dagiti pangta ti militar manipud iti Beijing.
