LAOAG CITY – Nagtalinaed ti takder ni Department of Public Workd and Highways (DPWH) Secretary Vince Dizon nga awan ti aniaman nga allocables wenno pondo para iti discretion dagiti agpanpanday linteg iti gakat a 2027 national budget ti ahensia.
Daytoy ket sungbat ni Dizon iti tengnga ti panagsaludsod ni ACT Teachers Partylist Antonio Tinio mainaig iti damag ti Philippine Center for Investigate Journalism (PCIJ) maipangep iti maibilang a leadership funds ken allocables kadagiti napalabes a tawen.
Inlawlawag ni Dizon a malaksid iti panagikkat kadagiti allocable ket saan pay a nausar ti dati a parametric formula iti panagbukel ti pondo.
Nupay kasta, maibasar ti 2027 DPWH budget kadagiti mismo a proyekto nga ipangpangruna ken inrekomendar dagiti distrito ken rehion.
Inbatadna nga addan iti 80% ti nasurok 11,000 a projects iti gakat a pondo ket adda opisial nga endorsement manipud iti Regional Development Councils (RDCs), maysa a dakkel ti nagngatoanna ngem iti dati a 25% agingga 30% laeng.
Mangnamnama ni Dizon a maaprubaran ti budget gapu iti ad-adu a proyekto a maipatungpal inton sumaruno a tawen.
