LAOAG CITY – Dinayaw ni Australian Ambassador Hae Kyong Yu ti kinapintas ti Ilocos Norte.
Kangrunaan a dinayawna ti kinapintas ti buya ti aglawlaw a dinanggayan ti napintas a kasasaad ti panawen.
Inbunannagna a kangrunaan a rinanta ditoy probinsia ti pannakipagkitana ken ni Gob. Matthew Marcos Manotoc.
Inlawlawagna a nalawa ken nauneg ti relasyon ti Australia ken ti Pilipinas ken saan laeng a nakasentro iti Manila ken iti Canberra no di ket iti sibubukel a Pilipinas ken Australia.
Inbatadna a kalikagumanna a makita a mismo no ania dagiti napintas nga oportunidad a pagbinnuligan dagiti dua a pagilian. Innayon ni Yu a tarigagayna nga ad-adda pay a mapatibker ti relasyon dagiti Filipino a pakairamanan dagiti Ilocano ken dagiti Australiano.
