LAOAG CITY – Nagpila ti Anti-Money Laundering Council (AMLC) ti tallo a petisyon para iti civil forfeiture wenno panangibabawi ti assets a konektado iti flood control corruption kalpasan ti innem a bolan nga imbestigasyon ken freeze orders.
Iti maysa nga statement, inrakurak ti konseho a sakopen ti petisyon dagiti asset dagiti indibidwal ken entities nga immunan nga inisyoan ti Court of Appeals ti freeze orders.
Saan metten nga indetalye ti konseho dagiti nagan wenno eksakto a balor ti assets a sakopen dagiti petisyon.
Iti agdama, pinalubusan ti Manila Trial Court ti dua a temporaryo nga asset preservation orders tapno ma-secure ti monetary instruments ken dagiti sanikua kabayatan a nakapenpen dagiti kaso.
Basar iti Anti-Money Laundering Council, ti panagpila ti civil forfeiture ti maudi nga addang tapno masigurado a mapasubli dagiti natakaw a kwarta a konektado iti maanomalya a flood control projects.
Iti datos ti konseho, nakai-freeze daytoyen ti pakabuklan a P27.8 bilyon a balor ti assets a konektado iti maipagarop a kontrobersiya.
