LAOAG CITY – Inaprubaran ti Kamara de Representantes iti maikadwa a pannakaibasa ti nailungalong nga Anti-Political Dynasty Act a gagem na nga ipawil nga aggiddan wenno agsasaruno ti panagturay dagiti agkakabagyan iti maymaysa a lugar.
Iti babaen ti House Bill No. 8389, saan a mabalin nga agpaidasig wenno agtakem iti agpada a lokalidad ti agasawa wenno agkakabagyan agingga iti second degree of blood wenno relationship.
Karaman ditoy dagiti posisyon iti barangay, munisipyo, ciudad, probinsya ken distrito iti Kamara de Representantes.
Indaulwan da Speaker Faustino “Bojie” Dy III ken Majority Leader Sandro Marcos ti nasao a gakat a sinuportaran met ti nasurok a 170 nga agpanpanday linteg.
Segun kadagiti sponsors, gagem daytoy a papigsaen ti panagtalek ti publiko iti gobierno ken ipaayan ti patas a gundaway dagiti dadduma a sumrek iti serbisyo publiko.
