LAOAG CITY – Inlawlawag ti asawa ni dati a Congresman Mike Defensor a ni Julie Defensor mainaig iti kaso nga human trafficking nga inrekomendar ti NBI kontra kenkuana ken ti anak da.
Segun ken ni Julie Defensor, awan ti pagibasaran ken malisyoso dagiti alegasyon kontra kenkuana, ti anak na ken ti negosyo da.
Iti statement, inlawlawag na nga awan ti koneksyon da iti estabilisimyento iti Pasig City a nagoperaran ti NBI.
Inpetteng ni Defensor, a ti addang ti NBI ket paset ti panangharharas iti pamilya da ken inar-aramid laeng ti ahensya ti kaso.
Innayon na a gapu iti panangip-ipit da iti pamilya da, adda ti sangaribo nga empleyado da ti napukawan ti trabaho.
Nagpanawagan ni Julie Defensor ken ni NBI Director Melvin Matibag, a no adda ti personal a gura na ken ni Mike Defensor, sangwen na a direkta ken saan nga iraman ti pamilya na ken ti ginasut nga inosente nga empleyado.
