LAOAG CITY – Naiwayat ti maikadua a preliminary investigation ti Department of Justice mainaig iti kaso dagiti mapukpukaw a mammallot.
Inatendaran mismo daytoy ti sumagmamano a kabagian dagiti mapukpukaw a mammallot, abugado ti agsinnungbangir a partido ken pannakabagi ti Philippine National Police – Criminal Investigation and Detection Group.
Iti naisayangkat a panagdengngeg ti panel of prosecutors, ditoy nga insubmitir ti Philippine National Police – Criminal Investigation and Detection Group ti lima a kopya ti USB mainaig iti kaso dagiti mapukpukaw a mammallot.
Inbatad ni Senior Assistant State Prosecutor Charlie Guhit, daytoy ket kagiddan ti panangibilin kadakuada ti prosekusion nga iprisentar daytoy idi kiddawen met dagiti respondents a ni Charlie ‘Atong’ Ang.
Iti baet a pinalubosan ti panel of prosecutors, nagkedked pay laeng nga irakurak wenno ipublikar ni Guhit ti mainaig iti linaon ti nasao nga USB.
Kagiddan daytoy, pormalen nga inobligar ti prosekusion dagiti respondents pakairamanan ni Charlie ‘Atong’ Ang a sumango iti sumaruno a preliminary investigation.
Naammoan nga inbilin ti panel of prosecutors kadakuada nga isubmitirda metten ti counter affidavits-da kas respondents iti kaso dagiti mapukpukaw a mammallot.
Mainaig iti daytoy, ti negosiante a ni Atong Ang ken dadduma pay ket sumangsango iti reklamo a multiple murder ken serious illegal detention mainaig iti pannakapukaw dagiti mammallot.
Kabayatanna, ti sumaruno nga schedule met ti Preliminary Investigation ket naikeddeng inton Nobiembre 3 kalpasan a nakanselar ti umuna nga schedule nga Oktubre 13.
