LAOAG CITY – Inbutaktak ni Atty. Levito Baligod a malaksid kadagiti 18 a maipagarup a marino, adda ti sumagmamano pay nga indibidual ti nangipaay ti ebidensia mainaig iti alegasion iti panangipatulod ti P805-bilyon iti sumurok 30 nga opisial ti gobierno.
Inpakita ti nagbalin a vetting process sakbay a naisubmitir ti affidavit dagitoy idi kalman iti Office of the Ombudsman.
Inbatadna nga adda ti nakasarsaritana a kadua dagiti marino a saanda pay laeng a kayat a dumatag iti agdama.
Kunana a malaksid kadagiti ebidensia nga inted dagiti 18 a marino, nangipaay pay daytoy kadagiti ladawan ken dokumento.
Innayonna nga immunana a nakasarita dagitoy idi Oktubre agingga a napagnunumoanda nga iruar dagiti ebidensia gapu iti maysa nga insidente.
Kabayatanna, awan ti nadakamat ti abugado no adda ti baro nga ebidensia a nairaman iti naipasa nga affidavit iti Ombudsman.
Naammoan a dagiti nakailanad iti naisubmitir nga affidavit ket maawagan nga allegation of ultimate facts no sadinno a kuna ti abugado nga apaman a mangrugi ti imbestigasion ket ditoy laeng a rummuar dagiti specific nga ebidensia.
