LAOAG CITY – Naklaat ni Bise Mayor Hilario Lorenzo iti ili ti Marcos mainaig ti alegasyon ni Engr. Warner Macusi, municipal engineer iti nasao nga ili nga agdawdawat ti opisyal ti lima a prosiento iti kadagupan dagiti maipatungpal a pryekto.
Nakasuron ken nakakatawa ti narikna ti bise mayor kalpasan a naipadanun kenkuana ti alegasyon gapu ta awan ti kinapudno na daytoy ken masuron kalpasan ti pannakaiwaragawag ti nagan na.
Gapu iti daytoy, kuna ni Lorenzo a sinuratan ni Macusi nga agturong iti opisina da tapno malawlawagan ti isyu.
Kinarit na nga ayaban ti inhinyero dagiti kontraktor a nangibagaan na iti lima a porsiento a dawdawten na kadagitoy.
Inpetteng ni Lorenzo nga awan ti kinasangsango na a kontrator bayat ti panagtugaw na kas bise mayor nangruna iti nagakem kas acting mayor malaksid iti panagpakada ti maysa a kontraktor a rugian da ti maysa a proyekto.
Mainaig iti daytoy, nadakamat ni Lorenzo ti pannakabidding ti Sangguniang Bayan Office a namindua a napaay ti pannakabid na gapu ta saan a kabaelan dagiti kontraktor.
Inbatad na nga iti naglabas nga administrasyon ket agusar ti dummy ti inhinyero wenno isuna pay ti mangubra wenno mangawat ti proyekto ken adda ti lima a porsiyento a royalty fee na.
Innayon ni Lorenzo a dagiti kwestiyonable met a proyekto ni Macusi ket saan na pay a nasungbatan.
