LAOAG CITY – Naiyakar ti iskedyul ti pannakaisayangkat ti Ayala Museum Doll Collection Exhibit ditoy probinsia.
Daytoy ti kinumpirmaran ti Provincial Tourism Office.
Daytoy ket manipud iti orihinal nga Oktubre 25 agingga iti Disiembre 31 a pannakaiwayat ti Ayala Museum Doll Collection Exhibit ditoy probinsia ket naiyakar daytoyen inton Nobiembre 22, 2024 agingga inton Enero 31, 2025.
Basar iti naiparuk-at nga inpormasion, daytoy ket gapu pay laeng iti iduduparak ti Bagyo Kristine ditoy probinsia.
Inpasingked ti Provincial Tourism Office a ti naiparuk-at a baro nga iskedyul ket isu ti maipatungpal.
Maipalagip nga inbatad ni Mr. Xavier Ruiz, Officer In Charge ti Provincial Tourism Office a nakikammayetda iti Ayala Museum tapno maitandudo dagiti scale dolls a mangirepresentar ti Philippine Traditional Attire manipud kadagiti nagduduma a period wenno panawen.
