LAOAG CITY – Inbatad ni Senate President Pro Tempore Panfilo Lacson nga awan pay ti naestablisar a maymaysa nga “overall mastermind” iti panagtultuloy ti imbestigasyon ti Senate Blue Ribbon Committee mainaig iti maipagarop a maanomalya ken ghost flood control projects.
Kuna na a ti makitkita da ket maipagarop a pattern ti lokal ken agkakakonektar a korapsyon.
Segun ken ni Lacson, chairman ti komite, rumrumuar kadagiti nakalap nga ebidensya a mabalin nga ado dagiti indibidwal ti karaman iti nagduduma a lugar imbes a maymaysa laeng ti tao a mangkonkontrol iti operasyon.
Inpetteng na a rumrumuar a “greed” wenno kinaagom ti mangidurduron iti kastoy a sistema no sadinno a maipagarop a gungundawayan ti sumagmamano nga opisyal ken kontraktor dagiti proyekto ti gobierno iti babaen ti substandard nga implementasyon wenno ghost projects.
Agtultuloy paylaeng ti imbestigasyon ti komite a mangtutuk kadagiti partikular a proyekto a naduktalan a nadadael wenno saan a mabalin nga usaren idinto a palawaen pay daytoy iti Visayas ken Mindanao.
Segun ken ni Lacson, isumitir ti komite dagiti resulta ti imbestigasyon iti Office of the Ombudsman at Department of Justice para iti possible a panagpila ti kaso.
