LAOAG CITY – Maysa a babai manipud idiay Pennsylvania ti posible a naka-jackpot kalpasan a nakagatang ti maysa a drawing nga agbalor ti $12 wenno katukad ti sumurok P680 iti maysa a collector’s auction a mabalin a maysa a partuat ti nalatak a French impressionist a ni Pierre-Auguste Renoir.
Ni Heidi Markow, akinkukua ti Salvage Goods Antiques idiay Easton, Pennsylvania ket nagatendar iti maysa nga auction iti Montgomery County tapno agbiruk dagiti mailaklako nga antique a ramit no sadinno a nakitana ti simple a drowing.
Naammoan a kadagupan kadagiti adu nga artwork nga agbalor ti rinobu a dolyar, ti nasao a drawing ti saanda a pilpilien agingga nga isuna ti gimmatang iti daytoy.
Apaman a nakaawid, ditoy a nariparna ti dandanin a maikkat ti pirma iti artwork. Iti panangarisitna, naduktalanna a maysa daytoy nga obra nga aramid mismo ni Renoir.
Saanen a nagsayang pay ti oras ni Markow ken inpakitana iti maysa nga eksperto iti arts. Basar kadagitoy, mabalinnga aggapu daytoy ken ni Renoir ti drawing. Iti agdama, dumaldalan iti naiget a panangtingiting ti Wildenstein Plattner Institute para iti pormal a pammaneknek.
Mangnamnama ni Markow a mapaneknekan ti orihinal nga artwork.
No mapaneknekan a daytoy ket pudno a Renoir, posible a dumanon ti innem agingga iti pito a digits ti gatad daytoy.
