LAOAG CITY – Maysa a babai idiay Estados Unidos ti naminsan manen a nakagun-od ti Guinness World Record title gapu iti panagbalinna a bigotilya.
Ni Erin Honeycutt manipud idiay Caro, Michigan ket pormal nga addaan ti kaatiddogan nga iming iti intero a lubong para iti maysa a babai no sadinno a dimmanon daytoy ti 31 centimeters.
Idi 2023, immuna a nakagun-od isuna ti world record title a “longest beard on a living person (female)” ken ita ket nakaawat met ti titulo a “longest moustache on a living person (female).”
Inbatad ni Erin, datina nga ik-ikaten ti imingna gapu ta kanayon a dumandanon iti bibigna ngem saan a nagbayag ket binaybay-anna latta daytoyen.
Naammoan a ti balbas ken imingna ket gapu iti polycystic ovarian syndrome (PCOS), maysa a kondision ti hormonal imbalance ken nakaro a panagtubo ti buok iti bagi.
Iti rugina, tallo a daras daytoy nga agahit iti kada aldaw tapno mapagtalinaed a nadalos ti rupana ngem nabannog isunan iti paulit-ulit a panagahitna.
Iti agdama, addaan daytoy ti dua a Guinness World Records, maysa a pammaneknek ti panagbalin a pudno iti bagi ket agbalin a world-class.
