LAOAG CITY – Inarestar dagiti pulis idiay Pattaya, Thailand ti maysa a babai kalpasan nga inpasiarna ti tarakenna a leon a nakalugan iti convertible car.
Napagsasaritaan ti Thai netizens ti bidyu ken ladawan ti maysa a leon a nakalugan iti naka-top down a convertible Bentley.
Makita iti bidyu a ladawan a casual a nakatugaw iti likudan ti lugan ti leon nga arig ket nasingpet nga aso.
Kalpasan a napagsasaritaan, inimbestigaran dagiti otoridad no asino ti akinkukua ti leon ken na-trace a nakarehistro ti Bentley iti maysa a babai nga agnagan ti Sawangjit Kosoongnern.
Segun ken ni Kosoongnern, nagatangna ti leon iti Nakhom Pathom Province ngem naduktalan dagiti otoridad nga awan ti umiso a papeles ti panagtagikuana iti leon.
Ipalpalubos ti Thailand dagiti private citizens nga agtaraken ti leon ngem masapol dagiti maiyannatop a papeles ken nasken a nakarehistro daytoy iti gobierno.
Gapu iti daytoy, sumango iti pannakaibalod ni Kosoongnern ken mabalin daytoy a mamulta ti 100,000 baht a katukad ti P158,000.
Basar kadagiti wildlife officials idiay Thailand, agbalor ti nasurok 500,000 baht wenno katukad ti P780,000 ti maysa a leon.
Iti agdama, 224 a leon ti akinkukua ti private individuals idiay Thailand.
