LAOAG CITY – Nabirukan ti bangkay ti maysa a babai iti igid ti baybay a paset ti Barangay 7, Estancia iti ili ti Pasuquin.
Binigbig ni Police Lt. Floro Cosning Jr., ti Deputy Chief of police iti ili ti Pasuquin ti biktima a ni Cyryne Diza y Balaan, agtawen ti 24, balasang, empleado iti LGU-Vintar ken residente iti Barangay 22, Manarang iti ili ti Vintar.
Inbatad ni Cosning a basar iti imbestigasyon da, agmaymaysa ti biktima a napan iti igid ti baybay babaen ti panaglugan na ti motorsiklo na no sadinno nga idi malem ket adda dagiti nakakita nga agtutugaw iti maysa a kubo-kubo iti lugar.
Nupay kasta, nakita laengen ti bangkay ti biktima iti igid ti baybay babaen iti agnagan June Retamal.
Mainaig iti daytoy, inbatad ti nobyo ti biktima a ni John Daren Dalere nga agarop tallon nga aldaw nga irekreklamo ti nobya na a saan a makaturturog ken naigiddan pay ti panaggurigor ni Diza.
Innayon na nga awan ti ammo na a sabali a problema ti nobya na ken saan da pulos nga agap-apa.
Kabayatanna, inpakaammo ni Cyrelle Diza, ti kasingin ti biktima nga idi kalman ket saan a napan nagubra ti kabsat na gapu ta inbaga na nga aggurigor daytoy.
Kuna na pay a saan nga ugali ti kasingin na ti agibaga no adda dagiti problema na.
Segun pay ken ni Cyrelle, panagkita na ket adda ti mental problem ti kasingin na no sadinno nga idi High School da ket nagpukaw ken nakadanun iti kabanbantayan a rabrabii.
Innayon na a mahilig iti baybay ti kasingin na ken possible a napan nagpalpallailang a maymaysa iti ili ti Pasuquin.
