LAOAG CITY – Kinumpirmaran ni Mayor Joseph de Lara iti ili ti Solsona a naipanen iti Mariano Marcos Memorial Hospital and Medical Center ti maikapat a kaso ti COVID 19 ditoy probinsya.
Inbaga na a ti nasao a pasyente ket maysa nga OFW a babai a masikog manipod iti UAE, ken residente daytoy iti Brgy. Catangraran iti nasao nga ili.
Segun ti mayor, simmangpet ti nasao nga pasyente idi lunes, Hunyo kinse iti ili ti Solsona manipod iti Clark Pampanga kalpasan a dimmalan ti quarantine iti nasao a lugar.
Innayon ti opisyal a naalaan ti samples ti pasyente iti nasao a lugar ken naeksamen ngem rimwar laeng ti resulta na idi kalman.
Inpasingked ti mayor ti nga awan ti rumbeng a pagdanagan dagiti residente iti nasao nga ili gapu ta naidiretso ti nasoa nga OFW iti quarantine facility iti ili a Solsona.
Imbatad na a nangiyuswat dan ti contact tracing kadagiti possible a nakapulapol ti pasyente ken naipatungpal metten ti lockdown iti quarantine facility a nakaipanan ti nasao nga OFW tapno masigurado a saan a maiwaras ti virus.
Nagpalagip manen ti mayor ti naan-anay a panagan-annad dagiti residente, masapol ti panagusar latta ti facemask nu rumwar iti pagtaengan, obserbaren ti social distancing ken proper sanitation tapnu masigurado a saan a maiwaras ti virus iti nasao nga ili.
