LAOAG CITY – Nakastreken iti Philippine Area of Responsibility ti kaunaan a bagyo ditoy Pilipinas a naawagan kas bagyo Aghon.
Basar iti Bombo Weather Center, ti bagyo ket manamnama a mabukel ita a Biernes manipod iti maysa a Low Pressure Area (LPA).
Alas-10 ti bigat di kalman, Mayo 23, nasaripatpatan ti Low Pressure Area nga adda ti kaadayonna a 870 a kilometro iti abagatan a daya ti Mindanao.
Nakita a dumuprak ti Low Pressure Area idiay Samar ngem posible met nga umasideg laeng iti Eastern Visayas ken Bicol sakbay nga aglikko nga umadayo iti pagilian.
Iti agdama ket saan pay a manamnama a dumuprak daytoy iti daga ken agtalinaed pay laeng iti baybay.
Nupay kasta, saanda nga ikkaten ti posibilidad nga ag-landfall latta ti nasao a bagyo.
Mainaig iti daytoy, inton Domingo ket posible a pumigsa pay ti mabanbantayan a dakes a paniempo a mabalin a dumanon iti tropical storm ken severe tropical storm kabayatan nga umad-adayo iti pagilian.
Kabayatanna, basar iti datos ti Bombo Weather Center, ti mata ti bagyo ket agdama a nasaripatpatan iti 340 a kilometro iti daya a paset ti Hinatuan, Surigao del Sur.
Adda ti kapigsa daytoy nga angin a dumanon iti 45 a kilometro iti kada oras nga asideg iti tengnga nga adda ti panagtudona a dumanon iti 55 a kilometro iti kada oras.
Agdama daytoy nga agliklikos iti laud nga agpa-amianan a laud nga addaan ti kapaspas a 30 a kilometro iti kada oras.
Gapu iti nasao a bagyo, mabalin a makapasar ti panagtudo kagiddan ti panagbayakabak ti Eastern Samar ken Dinagat Islands.
Naulep a tangatang ken mawaraswaras a panagtudo ken panagkimat pakairamanan ti panaggurruod ti mapaspasaran iti Bicol Region, Northern Mindanao, Davao Region ken ti nabatbati a paset ti Visayas ken Caraga Region.
Easterlies met ti makaapektar iti Metro Manila ken nabatbati a paset ti pagilian isu a namnamaen latta ti apagapaman a naulep agingga a nakuyem a tangatang nga adda ti panagtudo ken panagkimatna nangruna iti malem ken rabii.
Iti agdama, naibayog iti pagsenyalan numero uno iti Eastern Samar, Dinagat Island, Siargao Island ken Bucas Grande Island.
Maibasar iti nakita a track daytoy ket adda ti posibilidadna nga ag-land fall daytoy iti paset ti Eastern Samar.
