LAOAG CITY – Inlawlawag ni Prof. Herdy Yumul, maysa a sociologist iti Mariano Marcos State University (MMSU) iti ciudad ti Batac no kasano ti kinapateg iti Pilipinas ti Balangiga Bells a nadakamat iti maudi a State of the Nation (SONA) ni Presidente Rodrigo Duterte.
Segun kenni Yumul, ti Balangiga bells ket simbolo saan laeng nga iti gubat no diket iti pammati dagiti Pilipino nangruna ket maysa a catholic nation ti Pilipinas.
Inbatad na nga innala dagiti Amerikano dagiti tallo a Balangiga Bells idi 1901 iti San Lorenzo de Martin Church idiay Balangiga, Eastern Samar, kas souvenir iti panagballigi da iti gubat.
Inpetteng na a ni laeng Presidente Duterte ti naka-pressure iti Amerika tapno maisubli ditoy pagilyan ti Balangiga idi 2018 kalpasan ti 117 a tawen.
Kunana a maysa laeng daytoy kadagiti balligi wenno maipannakkel ti administrasyon ni Presidente Duterte.
