LAOAG CITY – Natay ti nakamotorsiklo kalpasan ti panagdinnungparda iti maysa nga LPG Bullet Tanker iti national road iti Barangay Apatut-Lubong iti ili ti Pinili.
Ti driver ti motorsiklo nga Honda Click ket agtawen ti 43, naasawaan ken residente ti Barangay Santa Lucia, Ilocos Sur idinto a ti nangiturong ti LPG Bullet Tanker ket agtawen ti 42, naasawaan, truck driver, tubo idiay Barangay Batang, Ligao City, Albay ngem agdama nga agnanaed iti Sitio 5, Barangay 41, Balacad ditoy siudad ti Laoag.
Basar iti Pinili Municipal Police Station, idi nakadanon ti nakamotorsiklo iti kurbaan a paset ti kalsada nga agturong nga agpa-amianan ket napukawan ti kontrol ti manibela.
Gapu iti daytoy, naikabil ti driver ti motorsiklo iti sabali a linya ti kalsada a nangitunda ti panagdinnungparda iti sumungsungad nga LPG Bullet Tanker nga agturong met nga agpa-abagatan.
Nagsagaba ti sugat iti nagduduma a paset ti bagi ti driver ti motorsiklo a naitaray iti Mariano Marcos Memorial Hospital and Medical Center iti siudad ti Batac ngem naideklarar a dead on arrival babaen ti attending physician idinto a saan met a naan-ano ti nangiturong iti LPG Bullet Tanker.
Iti agdama, adda iti Pinili Municipal Police Station ti driver ti LPG Bullet Tanker para iti naan-anay nga imbestigasion.
