LAOAG CITY – Inpakaammo ni Mayor James Bryan Alcid nga adu pay dagiti kayatna a maaramid para iti siudad ti Laoag.
Segun kenkuana, daytoy ti maysa kadagiti ibagbagana kadagiti department heads iti lokal a gobierno gapu ta isuda ti katulunganna tapno in-inot a matungpal dagitoy.
Inbatadna a no adda ti panagtataripnong dagitoy ket kitkitaaenda no ania pay dagiti kurang wen aramidenda.
Kunana a kada sektor ket kasapulan nga adda ti improvements-na wenno pagdur-asanna babaen kadagiti maiyim-implimentar a programa.
Mainaig iti daytoy, kuna ti Mayor a nalpasen ti planoda para iti 2026 ken kasapulan laeng a ganaten a maiyimplimentar gapu ta adda amin target date-na dagitoy.
Innayonna a no maiyimplimentar a nasayaat dagiti programa iti umiso nga aldaw ket mabalin a magun-odda manen ti SGLG gapu ta daytoy ti maysa kadagiti pakakitaanda no nagtrabhoda met laeng nga husto.
