LAOAG CITY – Nainaguraran ti baro a Balay Silangan iti ili ti Dingras nga inatendaran da PDEA Region 1 Director Bryan Babang, Asst. Regional director Atty. Marvin Tavares, Mayor Joefrey Saguid, PDEA Provincial Director Dheo Tabur, pannakabagi ti gobyerno probinsyal ken dadduma pay.
Naragsakan met ni Police Major Ryan Retutar, hepe ti PNP Dingras ti panaglukat ti baro a Balay Silangan.
Mainaig iti daytoy, inbatad ti hepe nga iyur-uray da iti resulta ti validation ti regional overside committee sakbay a maideklara ti Dingras kas drug cleared municipality.
Inrakurak na a naideklara kas drug cleared dagiti amin a barangay iti nasao nga ili ken naiyendorsar na daytoy iti Philippine Drug Enforcement Agency.
Segun kenni Retutar, iti kaudian a monitor na kadagiti 465 a drug surenderee ket negatibo da kalpasan iti idadalan da iti drug test.
Naamuan ti Bombo Radyo a ti Balay Silangan ket agserbi a pagtalinaedan dagiti naigamer iti iligal a druga nangruna dagiti kayat na ti agbalbaliw.
Inpakaammo ni Regional Director Bryan Babang, iti Philippine Drug Enforcement Agency Region 1 a maikasiam ti kaluklukat a Balay Silangan iti ili ti Dingras iti intero a rehiyon.
Inlawlawag na nga agserbi ti nasao a pasilidad para kadagiti adda ti pannakainaig na iti iligal a druga a kayat na ti agbalbaliw.
Inbalakad ni Babang iti agtultuloy ti information dissemination ken pananggutigot iti umili nga agreport kadigit illegal drug activities.
Kabayatanna, kuna met ni Mayor Joefrey Saguid iti nasao nga ili a maiprayoridad dagiti kailian na a drug surenderee ti mangusar ti nasao a pasilidad nupay adda dagiti kayat na maaddan ti Memorandum of Agreement.
