LAOAG CITY – Nakita ti sumagmamano a mangngalap ti agtatapaw a bangkay ti maysa a maladaga a lalaki iti Bislak River iti Barangay 4 iti ili ti Bacarra.
Daytoy ti kinumpirmaran ni Police Major Arnel Tabaog, ti chief of police iti nasao nga ili.
Segun ken ni Tabaog, kalpasan a naitawag iti opisina da ti pannakakita dagiti mangngalap ti bangkay ti maladaga ket insigida da a napan nagresponde iti lugar.
Inbatad ni Tabaog a ti maladaga ket saan pay a naikkat ti umbilical cord na ken ado ti nakita a sugat iti bagina.
Patien ni Tabaog a saan nga iti Barangay 4 iti ili ti Bacarra ti nakaiyanudan ti maladaga no di ket possible nga iti sursurong ti nasao nga ili.
Innayon na a mabalin nga adda paylaeng ti biag ti maladaga idi naipasngay ken adda ti intensyon ti ina na a mangibelleng.
Inpakaammo pay ni Tabaog a kalpasan a naeksamen ti bangkay ti maladaga ket naipan iti punerarya tapno maikkan ti lungon ken maipunpun iti kamposanto.
Kabayatanna, nagpanawagan ni Tabaog kadagiti umili iti ili ti Bacarra ken iti ili ti Vintar a tumulong a mangduktal no siasinno ti ina a nangibelleng ti maladaga tapno maipaayan ti maiyannatop a pannusa ken maikkan ti hustisya ti pannakatay ti nasao a biktima.
