LAOAG CITY – Nabirokan ti maysa a bangkay ti mangngalap iti Caparispisan River iti Sitio Jupiter iti Brgy. Saud iti ili ti Pagudpud.
Nabigbig ti biktima a ni Michael Dodonggo y Dalumay, agtawen ti 36, addaan ti live-in partner ken residente ti nasao a barangay.
Basar iti Pagudpud Municipal Police Station, segun iti live-in partner ti biktima a ni Abigail Castro y Ulibas nga agarup alas diyes ti rabii idi Enero 3, ti nasao a biktima ket napanna insagana ti fishnet daytoy iti Caparispisan River.
Nupay kasta, sumagmamano nga oras ti napalabasen ngem saan pay a nagawid ti biktima.
Gapu iti daytoy, dimmawat ti tulong ti live-in-partner ti biktima tapno mapan kitaen daytoy ken mamati a posible a natnag ti biktima iti karayan.
Mainaig iti daytoy, kalpasan a nakita ti bangkay ti biktima ket dagus a naikabil daytoy iti Municipal Health Office iti ili ti Pagudpud ken dimmalan iti post-mortem examination.
Naammoan a ti rason ti pannakatay ti biktima ket Asphyxiation gapu iti pannakalmesna.
Kabayatanna, dagiti napan nagresponde iti insidente ket dagiti kameng ti Pagudpud Municipal Police Station, Bureau of Fire Protection iti ili ti Pagudpud, INTPU, Philippine Coast Guard, Barangay Officials ti Barangay Saud, Pagudpud RHU ken ti Municipal Disaster Risk Reduction and Management Office.
