LAOAG CITY – Inpakaammo ni Sangguniang Bayan Member ken Chairman ti Committee on Peace and Order Marvin Pascua iti ili ti Solsona a napilaanen ti kaso administratibo ni Barangay Chairman Rogie Dancel iti Barangay Lipay iti nasao nga ili.
Segun kenkuana, adda ti naipasa a maysa a resolusion a mangited ti bileg iti idadauloanna a komite a mangisayangkat ti imbestigasion ken panagdengngeg pakaseknan iti panangdanog ti bato ni Kapitan Dancel iti kaanakanna a ni Froilan Mark Racca.
Inbatadna a kaduana da Sangguniang Bayan Member Edison Boots De Lara ken Sangguniang Bayan Member Francis Gerald Ganotisi a mangadal ken mangtingiting ti kaso administratibo nga oppression, abuse of authority, grave and misconduct.
Kunana a mangipatulodda ti summon ken ni Kapitan Dancel ken nasken nga agsungbat ken agisubmitir daytoy ti counter affidavit iti uneg ti 15 nga aldaw apaman a maawatna ti surat.
Inlawlawagna a ti kabsat ti biktima ti nagserbi kas complainant kalpasan a saan pay a kabaelan a dumatag iti konseho gapu ta manarimaan pay laeng nga agpapaimbag daytoy ken manamnama a maipadalan ti operasion gapu iti nakaro a sinagabana a sugat ti agongna.
Innayonna a posible a mapatawan ti preventive suspension ti Kapitan no “guilty” ti rumuar a desision ti kaso ngem masapol ti substantial evidence a mangipaneknek a nagbasol ti mairekreklamo.
Maipalagip a nagkiddaw ni Pascua iti Philippine National Police iti ili ti Solsona ti panangipaay ti naan-anay a proteksion kadagiti maseknan nga agrekreklamo kabayatan ti pannagna ti nasao a kaso.
Immun iti daytoy, nakaruar iti pagbaludan ni Brgy. Chairman Dancel kalpasan a nagbayad daytoy ti 200 a ribu a pisos a piyansa para iti temporaryo a pannakawaya-wayana.
