LAOAG CITY – Nagballigi dagiti kameng ti PNP a nangtiliw ken ni Barangay Kagawad Ramil Curammeng, agtawen iti 34 ken residente iti Barangay Sta. Ana, Solsona, Ilocos Norte iti naiyuswat a drug buy-bust operation ti nasao a barangay.
Segun ken ni Police Inspector Ralph Dayag, ti chief of police iti ili a Solsona, naglako ni Curammeng ti maysa a sachet a naglaon ti maipagarop a napagango a bulong ti marijuana nga agbalor iti 500 a pisos.
Malaksid ti daytoy, adda pay ti naala da iti ikot na a dua a sachet a naglaon ti maipagarop a napagango met laeng a bulong ti marijuana.
Innayon na a ti nasao a barangay kagawad ket dagiti drug surrenderer ngem saan a nagsardeng iti illegal nga aktibidad na basar iti agtultuloy a pinangmonmonitor da kenkuana.
Kuna pay ni Dayag a ti suspek ket top 10 iti drug watchlist da.
Nupay kasta, inpetteng ni Curammeng nga inpabulsa da laeng dagiti naala nga ebidensya kontra kenkuana.
