LAOAG CITY – Inpakaammo ni Ms. Vilma Ranchez, ti mangidadaulo iti Community Affairs Office iti lokal a gobierno ditoy siudad ti Laoag a dakdakkelen ti akem dagiti barangay officials maipapan iti pannakaipatungpal ti road clearing operations.
Segun kenkuana, naipakaammo daytoy kadagiti amin a maseknan nga opisial ti barangay babaen iti panagatendarda iti taripnong iti online.
Inbatadna nga adda koma ti maisayangkat a road clearing operations idi Mayo 10 ngem naitantan daytoy ngem iyur-urayna pay laeng ti baro nga iskedyul daytoy ken imonitor ti Road Clearing Task Force.
Inlawlawagna nga addanto ti maangay a panagtataripnong dagiti barangay officials iti Laoag City Auditorium no sadino ket biningayda ti grupo para iti bigat ken malem.
Innayonna a babaen iti daytoy ket ad-adda pay a mapaigetan ti pannakaipatungpal dagiti pagannurutan ti Department of the Interior and Local Government iti uneg ti barangay.
