LAOAG CITY – Napagsasaritaan iti naiyuswat a public hearing ti manamnama a maipatungpal a plete iti tricycle ditoy siudad ti Laoag.
Daytoy ket babaen iti panangidaulo ti Committee on transportation nga imatmatonan ni ABC Federate President Mikee Fariñas.
Iti nasao a panagdenggeng ket nakipagpaset ti dagiti amin a tricycle drivers ditoy siudad pakairamanan ti riding public.
Immuna iti daytoy, nailanad iti draft resolution ti konseho a 20 pesos ti regular a plete iti umuna a 1.5 a kilometro ken manayunan ti tallo a pisos ti masingir nu adda ti nayun a 2 agingga iti 5 a kilometro ti kaadayo ti pagturungan ti pasahero.
Mainaig iti daytoy, nu lima a kilometro ken ad-adayo pay ti papanan ti pasahero ket adda ti nayun a lima a pisos a plete idinto a 15 pesos ti plete dagiti estudyante, person with disability ken senior citizens.
Kabayatanna, ti parte ti draft resolution nu sadino a 10 pesos laeng ti nailanad a plete dagiti agtawen ti 5-12 ket isu ti nabaliwan kabayatan ti public hearing gapu iti arungaing ti sumagmamano a tricycle drivers.
Gapu iti daytoy, kuna ni Fariñas a maidasar iti konseho ti 15 a pisos a plete dagiti agtawen ti 5-12 nu maymaysa nga aglugan iti tricycle ken epektibo laeng ti 10 a pisos nu dua wenno ad-ado pay dagiti pasahero nga adda iti nasao nga age bracket.
Inbatad ni Fariñas nga apaman a maaprubaran iti konseho ti nagbaliwan ti resolusyon ket naiget a maipatungpal ti baro a fare guide ditoy siudad ken maipawil ti arkila system.
Immunan a nagyaman ni Mr. Francisco Martin, ti presidente ti Federated Tricycle Associtaon of Laoag iti konseho gapu iti pannakaikonsiderar ti arungaing dagiti tricycle drivers a maipangato ti singir iti plete.
