LAOAG CITY – Suportaran ni Vice President Sara Duterte ti panawagan para iti panagwaywayas dagiti institusyon nga inisyal nga inrakurak ni Senate President Alan Peter Cayetano kalpasan ti pannakaarestar ni Senador Jinggoy Estrada para iti kaso a plunder mainaig iti flood control scandal.
Iti maysa a video statement, inrakurak ti Bise Presidente a mamati a masapol a protehiran ti kinawaya dagiti institusyon, saan laeng nga iti Senado ken kamara de representantes kas institusyon no di ket uray iti kada Senador wenno kongresista.
Kuna na a dagiti miembro ti dua a pagpandayan linteg iti kongreso ket masapol a nawaya a mangannong kadagiti pagrebbengan da nga awan ti panagipangta, panangipit wenno aniaman a klase ti panangbutbuteng.
Inpetteng pay ti Bise Presidente nga imbes a tutukan dagiti pudno a problema a sangsangwen dagiti Pilipino, maus-usar ti turay tapno mapagulimek dagiti boses a mangkonkontra iti gobierno.
Innayon na a ti gobierno a mabuteng kadagiti mangkonkontra iti daytoy ket saan a mangipakita ti pigsa, imbes ket ipakita ti kaawan ti kinatalged a makita iti sursuruten a direksyon ti pagilian iti agdama.
Karaman kadagiti dinakamat ti bise presidente a mailikliklik ti atension manipod kadagiti lehitimo a saludsud a mangbalbalkot iti kontrobersiyal a flood control projects, ti panangbalewala ti constitutional safeguards para iti panangilunglungalong ti “politically motivated” impeachment ken ti awan sarday na a panangitantandudo ti dakdakkel a bileg iti pulitika a mailemlemmeng iti likud ti Charter Change (Cha-Cha).
