LAOAG CITY – Ragsak ken panagyaman ti mangiladawan ti karirikna ni Mr. John Anthony Quevedo iti ili ti Sarrat, kalpasan a nakapasa iti April 2023 Pharmacist Licensure Examination.
Segun ken ni Quevedo, saan a nalaka dagiti nagdalanan na tapno makapasa iti nasao nga eksaminasyon.
Inbatad na a maysa kadagiti kadakkelan a karit kangrunaan iti batch na ket ad-ado ti nagbalin nga online classes da ngem iti actual gapu iti pandemiya, banag met a nakissayan ti tyansa da a ma-expose iti internship wenno training.
Mainaig iti daytoy, inpakaammo ni Quevedo nga isu ti umuna a degree holder iti pamilia da nu sadino a dagiti nagannak kenkuana ket agpada a saan a nakapagturpos iti kolehiyo agraman dagiti dua a kakabsat na.
Immuna iti daytoy, nagyaman ni Quevedo a dakkel a tulong iti panaggaed na a makagun-od iti titulo na kas pharmacist ti pamilya na, tulong dagiti kaklase na pakairamanan dagiti propesor iti Mariano Marcos State University a nagturposan na iti kolehiyo.
Maipalagip a top 3 performing school ti Mariano Marcos State University iti April 2023 Pharmacist Licensure Examination kageddan ti panagbalin a top 5 iti 2022 Bar Examination.
