LAOAG CITY – Inpasigurado ti baro a National Bureau of Investigation (NBI) Director a ni Melvin Matibag nga awan ti pabpaboran ken saan a padiktaran iti pulitika dagiti kameng ti ahensya iti babaen ti liderato na.
Pormal a nagtugaw iti pwesto ni Matibag kalpasan ti naisayangkat a turnover ceremony manipod ken ni outgoing chief Atty. Angelito Magno.
Dagus a sinango ti opisyal ti isyu mainaig iti panagbalin na a nasinged a kaalyado ni dati a Presidente Rodrigo Duterte, iti baet ti panagserbi nan iti administrasyon ni Presidente Ferdinand Marcos Jr.
Segun ken ni Matibag, saan a rumbeng nga agbalin a pagibasaran ti pulitika no di ket ti mismo a mandato ti ahensya.
Inpetteng na pay nga awan ti sacred cow kadagiti agtultuloy nga imbestigasyon ti NBI, partikular kadagiti mapagat-atapan nga anomalya iti flood control.
Inpaganetget na ti naiget a direktiba ti agdama nga administrasyon a pagsungbaten amin dagiti adda ti basolna.
