LAOAG CITY – Nakidanggay ti gobierno probinsyal ti Ilocos Norte babaen iti Provincial Library iti pannakikammayet na iti Dept. of Information and Communications Technology (DICT) iti pannakaobserbar ti National Information and Communications Technology (NICT) Month iti napalabas a bulan ti Hunyo.
Inpakammo ni Mr. Eric Coloma, provincial librarian a napanunutanda ti panangisayangkatda ti Basic Computer Literacy training idi Hunio beinte.
Imbatadna a naisayangkat a mismo ti nasao a panagsanay iti “tech4ed section” ti provincial library a masarakan iti maikadua a kadsaaran ti Centennial Arena kangrunaanna iti bangirna ti abagatan.
Inlawlawagna a dagiti dimmalan iti nasao a panagsanay ket dagiti duapulo ket lima a barangay officials manipud iti Barangay 1,2,3,4,5,6 pakairamanan ti 7-A ken 7-B ditoy siudad ti Laoag nga interesado a makasursuro iti Microsoft Word Application.
Nupay kasta, inlawlawag ni Coloma a mabalin nga iti masangoanan ket maiyuswat daytoy kadagiti nadumaduma nga ili ken siudad babaen iti pannakikammayetda iti met laeng Dept. of Information and Communications Technology ken kadagiti public libraries kadagiti maseknan nga ili ken siudad.
Innayonna a mabalin met dagiti interesado a barangay a makasursuro iti Basic Computer Literacy ti agkiddaw kenkuana ken daytoy ti mangikoordinar iti Dept. of Information and Communications Technology.
Maipalagip a nairubuat ti tech4ed center ti provincial library idi bulan ti Nobiembre iti napalabas a tawen 2022 babaen met laeng iti panagbinnulig ti Dept. of Information and Communications Technology ken ti gobierno probinsial ti Ilocos Norte
