LAOAG CITY – Kalikagom ti lokal a gobierno iti ili ti Bangui a manayunan ti benepisyaryo iti social pension iti nadakamat nga ili.
Segun kenni Mayor Denton Garvida, naduktalan na nga ado dagiti saan a maka-awawat ti social pension na.
Kunana a maawatan na ti pagannurutan ti gobierno national mainaig iti daytoy ngem saanna met a kayat nga adda dagiti umap apal a kailian na.
Inbatad na a daytoy ti rason no apay a kalikagom na a makita no sadinno ti mabalin a pangalaan ti pondo.
Nupay kasta, saanna pay a maibaga ti mayor no mano ti kalikagom da a maipaay a pension dagiti nataengan iti ili ti Bangui iti kada bolan.
Kabayatanna, inpasigurado ti mayor nga amin a pondo ti lokal a gobierno ket mausar kadagiti kasapulan dagiti umili pakairamanan dagiti senior citizens.
Innayon na nga usaren na ti naited a gundaway kenkuana a mangidaulo iti nasao nga ili tapno matulungan dagiti agkasapulan.
