LAOAG CITY – Nagpalagip ni FO3 John Patrick Anghel, maysa kadagiti team leaders iti BFP ditoy ciudad ti Laoag kadagiti umili mainaig iti piyesta dagiti minatay.
Inbatad ni Anghel a maysa kadagiti tradisyon ditoy pagilian ket ti panagsindi ti kandela ken panangipaay ti atang kas paset ti pananglagip kadagiti pimmusay nga ay ayaten iti biag tunggal madanun ti piyesta dagiti minatay.
Inbatad na a saan a dakes daytoy gapu ta isu ti maysa kadagiti tradisyon iti kultura dagiti tattao ditoy pagilian.
Nupay kasta, inbalakad na a masapol a bantayan a naimbag dagiti maseknan dagiti nakasindi a kandela gapu ta mabalin a pangrugyan daytoy ti uram.
Inpagunam-gunam ni Anghel a masapol a sakbay a talawan ti balay ket masapol a kitaen a nasayaat nu naiddep dagiti nasao a kandela tapnu masigurado a saan a makaparnuay ti uram.
